طرطور بالساطور.

ا.د.ضياء واجد المهندس.

بلور سيدة متزوجة (بس حبابة حيييل )وساكنة في شقة بعمارة يعني من مثيرات الجدل
على قول المثقفين ‘‘
وكل يوم من يطلع زوجها (مسرور) لشغله يصعد لها، شخص واحد ، شكل صغار ،و جماعة اكبار من كل الأنواع والتوجهات يعني.. صايرة وحدة وطنية
على قول *المستقلين
بحيث الناس الساكنه بالعمارة ملوا ولعبت نفسهم من كثرة الي تدخل العمارة على (بلوة كما كانوا يسمونها بدل بلور ) الصايرة بعمارتهم ملتقى جماهيري يعني .. توافقية وطنية
على قول الحزبيين ‘‘
وبيوم من الايام كلولها كافي ترى راح انفضحج
‘‘ يعني .. ايلوحون بملفات الفساد
على قول البرلمانيين
بس ماكو فايدة ،لما دزولها خبر احنا قررنا نجتمع بالليل ونجي نگول لزوجك ترى (واحد صاعد واحد نازل )
يعني .. يضربون بيد من حديد
على قول المصلحين ‘‘
المهم (منعولة الوالدين) خافت، وكالت :خل الگه فره زينة للسالفة يعني .. غطاء دستوري

على قول المشرعين ‘‘
واشتغل تفكير بنت ابليس، وجابت موس حلاقة، وطيرت نص من حاجبها ،
ومن رجع زوجها، كامت تبجي وادگ وتلطم
فسألها زوجها (طرطور كما كانوا يسمونه بدل منصور): گللها هاا شبيج حبيبتي شكو .. اشصاير .. دفهميني ؟
گلتله : جاي اعدل بحواجبي وكصيت حاجبي وجوارينا كلهم يضحكون عليه، ويصيحون وراي ‘‘واحد صاعد واحد نازل‘‘
‘‘ يعني ..تسقيط سياسي
على قول الاعلاميين ‘‘
هذا هم المعدل، صعدت الغيره براسه ، وطگت دمارات المرجله بجسمه، وصعد عرق الناموس ،فلكف ساطور اللحم، وطلع بنص العمارة يصيح : مناعيل الوالدين مرتي واحبها ‘‘ واحد صاعد واحد نازل ‘‘ انتوا شعليكم .. معليكم بيها، والي يندك بيها النوب اسويه كفته وارجعه لبطن امه .. يعنى العودة للمربع الاول
على قول السياسيين‘‘
الناس هم سمعت وكلها غلست ،وسدت ابوابها وطبوا جوه،، لان السالفة (قضية شرف)مثل متعرفون كلها طلايب وعطاوي وفصول وشكاوي وقط بمختلف انواعه ،لهذا قرر الجميع السكوت حقنا للدماء ودعما لرصانة الوحدة الاجتماعية
‘‘ يعني .. حفاظا على التجربة الديمقراطية
على قول الديمقراطيين‘‘
وذاگ الطاس وذاگ الحمام. قضيتنا مثل قضية منصور الطرطور البيده الساطور و يدافع على البلوة بلور و عن شرفها المستور …لأن أي ناشط أو اعلامي يفضح فساد الحكومة أو النواب تظهر مجاميع المسلحين الذين يدافعون عن أقطاب الفساد والرذيلة .. البروفيسور د. ضياء واجد المهندس. مجلس الخبراء العراقي